INFO-NEWS
Bonjour léif Awunner,
Wéinst dem Coronavirus konnte mir keng Generalversammlung an och kee Comité ofhalen well sämtlech Kulturcenter bis den Oktober zou sinn. Duerno wäerte mir erëm aktiv ginn.
Eng Informatiounstafel iwwert d’Geschicht vun de Jéiner
Madame Cum vun der Stad Lëtzebuerg huet ons matgedeelt, dass de Schäfferot d’Informatiounstafel aus Goss vun de Jéiner, déi op d’Mauer vum Centre Am Duer op Weimeschkierch kënnt ugeholll huet. Si sinn mat onse Propositiounen averstaan. D’Madame Schmit huet de Projet gemaach a si ka mat der Aarbecht ufänken.
Ee Bréif un d’Stad Lëtzebuerg iwwert de Summervëlo
De Comité vum Syndicat ënnerstëtzt dem Här Minister Bausch séng Initiative fir am Mount August verschidde Stroossen nëmme fir d’Vëloen opzemaachen.
Wärend de leschte Méint sinn hei zu Dummeldeng an der rue des Hauts-Fourneaux ganz vill Eltere mat Kanner voller Freed mam Vëlo passéiert. Och vill Awunner hunn dës Strooss fir ze joggen benotzt. Hei ass déi eenzeg Méiglechkeet d’Vëlospiste aus der Stad Lëtzebuerg an d’Vëlospiste vum Kierchbierg/Iechternach mat der Vëlospiste Richtung Norden ze verbannen. Iwwert d’Beggenerstrooss ass et ze vill geféierlech, dofir biede mir Iech Madame Polfer, dem Minister Bausch den Akkord ze ginn fir d’rue des Hauts-Fourneaux an d’rue Henri Dunant am August nëmmen fir de Vëlosfuerer opzemaachen. Nëmmen d’Bussen an d’Autoen vun den Awunner dierften dann ausschließlech hei passéieren.
De Parking virun der Gare zu Dummeldeng ass zu onser grousser Zefriddenheet nei amenagéiert ginn, mat zwou Opluedstatiounen fir elektresch Autoën, an enger Statioun mat dräi Autoën vun der Firma Flex, déi ee loune kann.
Hei waarde mir nach ëmmer op ons Vëloststatioun vun der Stad Lëtzebuerg, wou ee Velo zur Verfügung steet fir d’Awunner an d’Leit déi mam Zuch kommen.
An der Hoffnung, dass am Mount August vill Leit mat hire Kanner ouni Gefor an onse Stroossen mam Vëlo fueren fir Sport ze maachen a frësch Loft ze genéissen, soe mir Iech, Madame Polfer, villmools Merci fir Är Mathëllef a verbleiwe mat deene beschte Gréiss.
Pit Ludwig